U bent hier

As ’t laeve dich neet mier leef haet

Gezeen de truukloupende belangstelling veur de activiteit “Op waeg nao Kersmis” had ’t bestuur op de Algemeine Lejevergadering in april 2019 met gedeild det veur dees activiteit ’n alternatief gezóch zoel waere.
Det alternatief is veur 2019 gewaore:  ‘n opveuring door d’n hier Hay van Hoorn van ziene monoloog “as ’t laeve dich neet mier leef haet” en waal in ‘t Venloos. Dees opveuring vónd plaats op zóndaag 15 december 2019 in Theater De Garage in Venlo.
Op de ierste plaats vanoet ’t bestuur ‘n kómplement veur de getoeënde belangstelling veur dees opveuring. Van de 94 beschikbare plaatse ware d’r 70 bezatte. Daonaeve mót gezag waere det Hay van Hoorn deze monoloog veur mier dan 95% in ós modertaal haet oetgeveurd. Det haet, nao zien eige zegge, veur um ‘n ganse nieje dimensie aan ziene monoloog gegaeve.
Dees opveuring waas, gezeen de vuuele hiéle positieve reacties van de bezeukers, bezónder in de smaak gevalle. ’t Waas gewoeën muuskesstil tiejes de opveuring. ’t  Ónderwerp van dees veurstelling waas en is, gewoeën zwaor.  ’t  Bestuur had daorum beslaote um, ter veurbereijing van de bezeukers, veuraaf aan de veurstelling ’n laezing euver dit ónderwerp te laote gaeve. Dees laezing, die bezónder informatief waas, woort verzörg door mevrouw Lissette Dickhoff, manager beej Hulp bij Dementie Noord-Limburg. De opveuring waas zier indrökwekkend en gezeen ’t ónderwerp klink ’t meschiens raar, maar de bezeukers hebbe van dees opveuring genaote.
Det noow haet geliek de lat veur ’t bestuur hoeëg gelag as ’t geit euver ’t organisere van ’n activiteit rónd Kersmis 2020.

Wiel Maassen.