U bent hier

Slumste Venlonaer 2014

  • Op Zóndaag 26 oktober 2014 um 14.00 oor in de Venlonazaal

De wedstried veur de echte dialekle(e)fhebbers.

Taaldirigent : Hans Jacobs

De spannende taalwedstried veur de echte dialekle(e)fhebbers. Met teks en beeld loup geej door gans Venlo haer. Wae kin zegge det hae de slumste is !
 
D’r ware dit jaor leefs 21 koppels die meideje. Zeej ware allemaol op ’n unieke en herkinbare meneer oetgedos. Leuke hudjes, bluuskes, bleumkes, sliepse, boa’s. ’t Zoog d’r allemaol hiel kleurriek oet. Um 14.00 oor äöpende Hans Jacobs veur de 9e kier De Slumste Venlonaer (in ’t verleje Tieën veur Venloos). Eine gezellige middaag euver Groeët Venlo en euver ós modertaal : ’t Venloos. Alle koppels stelde zich iers efkes veur. De stumming kwaam d’r al good in en daonao begós de middaag.
 
De 1e spelrónde.: “De Venlose ABC’tjes”. Heej woorte o.a. vraoge gesteld euver börgemeisters in Venlo, euver VVV in Venlo.
In de 2e spelrónde, “wie ierder wie baeter”, krege de koppels de opdrach um nao 1 wies maximaal 4 aanwiezinge ‘ne persoeën te raoje, beejveurbeeld leedjesschriever Frans Boermans. As ’t koppel ’t beej de 1e aanwiezing al wis, dan leverde det 40 punte op. Beej 2 aanwiezinge 30 punte, beej 3 aanwiezinge 20 punte en beej 4 aanwiezinge 10 punte. Dus wie ierder det ’t koppel ’t wis, wie mier punte ’t op leverde, as ’t antwaord teminste good waas. In rónde 3 woort d’r ’n Venlose oetdrökking geneump en die meus dan op pepeer geteikend waere. Beejveurbeeld : Met de kónt naeve de deur gaon (prostitueren). In de 4e rónde krege de deilnemers allerhande letters doorein te zeen en meuste ze heejvan ‘n zoeë lank meugelik Venloos waord make. In de 5e rónde woorte d’r filmkes getoeënd van basisschoeële en meuste de name van de schoeële opgeschreve waere. In rónde nummer 6 woort d’r gevraog um straotname op te schrieve die beginne met ‘n H en d’r zien d’r hiel vuuel. D’r woort flink nao gedach. Inkele veurbeelde : Hertog Reinoudsingel, Herungerwaeg, Hoeëgeschoorweg. In de 7e rónde woorte d’r vraoge gesteld euver Groeët Venlo: Beejveurbeeld: “Wat is de taegehanger in Blierick van de Parkfeeste (Zoksfestival)?” En beejveurbeeld : “Wie hit de graanbranderie in Aarse “ (De IJsvogel). De 8e rónde waas : “Welk waord kump te veurschien?” In de 9e rónde kwame actualiteite oet tante Bet aan de orde en det vónd plaats door waordritse. En in de letste, de 10e rónde: “Wae spraek de waorheid”, hebbe de hiere Bert Ebus en Roel Versleijen, van twieë oetdrökkinge ‘nen oetlik gegaeve, waovan d’r eine juus waas en welke juus waas, meus dan waere aangegaeve. Umdet zeej ouk ein van de koppels ware, krege zeej zelf ouk twieë andere oetdrökkinge van Hans. Anders zoele zeej benaodeild zien umdet zeej in die rónde met de door eur veurgelagde oetdrökkinge neet mei kóste doon. Idderein kreeg dus gelieke kanse.
 
De jury had ’t d’r drök mei um nao iddere rónde de ingeleverde blajer nao te kieke en de punte beejein te telle. De ganse middaag waas d’r hiel vuuel plezeer beej idderein en waas d’r ’ne goje sfeer. Um 16.20 oor woorte de 3 winnende koppels bekind gemak door Hans en krege zeej de fillicitaties euvergebrach en ouk ‘ne pries.
 
Daonao, kwame de winnende Faatse van Blierick en van Venlo, ónder muzikale begeleiding van Joekskepel Flabbedeuis oet Venlo nao veure um eure pries in óntvangs te neme. Dit is zoeëas idder jaor ’n moeëj uniek beeldje, gemak door Mariëlle Franssen. 
De faatse winnaers van 2014 ware: 
- Jenne Peters oet Blierick met “De banke zien oet Blierick verdwene, de spaarzök zien weer verschene”.
- Rik van Ulft oet Venlo met : “Ziene MIKWE-G”.

Beeldjes zien gemak door Marielle Franssen.

Joekskepel Flabbedeuis oet Venlo haet ouk ’n aantal Vastelaovesleedjes ten gehure gebrach en zoeë kwaam de Vastelaovesstumming d’r ouk in de zaal good in.Op ’t ind meus d’r nog ‘ne winnaer volge oet ’t winnende koppel. Eine meus d’r efkes weg en d’n andere kreeg Venlose wäörd te hure en meus heejvan aangaeve wat ’t beteikende/c.q. ’n synoniem gaeve. Daoveur waas ’n minuut d’n tied. Daonao kwaam d’n andere persoeën van ’t koppel truuk en kreeg dezelfde wäörd te hure en meus ’t zelfde doon. De persoeën dae de meiste wäörd good had waas de winnaer.

Dan volg noow d’n oetslaag: De Slumste Venlonaer is gewaore: Jos Vullings
De winnende koppels zien:
Nummer ein :       Óngenuuejd : Jos Vullings en Henriëtte Bakker
Nummer twieë :   Die 2 oet ’t Noorde  :  Funs Peeters en Ton in ’t Zandt
Nummer dreej:     Weej 2 : Wiel van Aarssen en Ria van Aarssen
De poedelpries ging nao : JoHannie : Hannie Schreurs en Jo Schreurs
 
Alle deilnemers hebbe einen amusante middaag gehad en kómme volgend jaor gaer weer truuk.
Tot slot ’n bedankje aan idderein dae deze geweldige middaag meugelik haet gemak.
 
Gonnie Geurts

 

 

 

 

 

 

 

Opgaeve :