U bent hier

Tieën veur Venloos 2013

Op zóndaag 27 oktober um 14.00 oor goof den hièr Hans Jacobs ’t beginsignaal veur eine gezellige middaag umgaon met ós Moderstaal: Tieën veur Venloos.

Neet minder dan 19 teams zote zich achter ’t täöfelke beej hotel Wilhelmina um ónderein oèt te maake wae veur dees gelaegentigheid de Venlokinner(es) van 't jaor zoel zien. Aan de herkinbaarheid zoèl ’t neet ligge, want eeder team had zich, op verzeuk van de organisasie, waat leuks aangedoedeld: struuje hudjes, alde heuj, deftige sliepse, originele T-shirts, kleurige Boa’s en smokings en ’t waas in de zaal ein en al kleur waat-me zoog. De spelleider Hans Jacobs lag de regels oèt.

In de 1ste rónde woort gevraog nao bekinde Venlonaere: wao waas d'n börgemeister veur Venlo aan 't werk? Wae organiseert in 2014 de Venlose Boerebroelof, wae is d'n houftrainer van VVV enz. De 2de rónde waas 'n puzzelrónde van 'n aantal gegaeve letters (AECRKOSBSLHV of SMPEEEEKIKNL) ein zoeë lank meugelik Venloos waord make. De 3de rónde ging de straotekinnis van de deilnemers teste: wie hit de straot wao 't pliesieburo steit in Venlo, wie hit de straot wao 't Venlose station steit enz. De 4de rónde waas Waat of Wae meine weej: raoj bekinde Venlonaere. In de 5de rónde ware Venlose sportclubs aan de beurt. In rónde 6 kwame 'n 10 tal stellinge aan de beurt en meuste de deilenemrs door 't petje op of aaf te zette beslisse welke stelling de juuste waas. Daonao hebbe de hiere Bert Ebus en Henk de Boer ós waat wies perbere te make en meuste de deilnemers raoje wae 't good had. In de 8ste rónde gove inkele Venlonaere in ein filmke eine oetleg euver (weer) bekinde Venlonaere en kóste de deilnemers beslisse euver wae d'r gespraoke waas. In de veurletste rónde deende de deilnemers eur hendigheid met wäörd te laote zeen door verscheije waord aan ein te ritse. De letste rónde ging euver gerechte op zien Venloos en 't Venlose kaokbook van Dialekvereiniging Veldeke Venlo waas heej de leidraod. 't Sprik vanzelf det d't tösse de deilenemde teams vuul plezeer waas.

Nao edere rónde had de jury de hand vol um de ingeleverde blajer nao te kieke zoeëdet gauw genóg nao ’t letste speul bekind gemak kós waere wae in finale speulde. Det waas aevel waal lastig, want d'r ware 3 teams met ein geliek aantal punte (NOEëTS DRUUEG 1 de hiere Gerard van Gestel en Bert Driesen en VEUR DE JOEKS: de dames Carien Hafmans en Els Joosten en DE MUTSE: de dames Mirjam Schweitzer en Petra Hendriks) en meus Hans Jacobs ein tösse speul doon um de echte finaliste te bepaole en detwaar 't team De Mutse: de dames Mirjam Schweitzer en Petra Hendriks. Dees dames hadde ouk in 't finalespeul aevevuul punte en woorte door Hans Jacobs allebei oetgerope tot Venlokinners 2014. De poedelpries ging nao de Viecuriekes de dames: Annet Scheepers en Emmelie Wallinga.

Alle deilnemers, inclusief 't Venlose Boerebroedspaar 2014 Evert Schnock en Loes Peters) hebbe eine geweldig amusante middaag gehad en kómme 't volgend jaor weer truuk.

De faatse winnaers 2013

In de pauze woorte de Veldeke trofeeje oetgereik aan de winnaers oet de Blierickse en Venlose vastelaovesoptochte. Joekskepel Flabbedeius begeleide de winnaers de zaal in veur Blierick: Geert Rutten, Ben Bettinger en veur Venlo Jos Valkenburg. Zeej krege oet hand van de jury eure trofee dae gemak waas door Mariëlle Franssen.

Weej as Veldeke meuge gruuëts zien op eine geslaagde maar veural gezellige middaag, danke alle deilnemers en vertrouwe d’r op det weej óg volgend jaor weer truuk zeen.