Opus Jocus

Opus Jocus

Zaoterdaag 29 oktoeber 2011 waas de jaorlikse leedjesaovend van Venloos Vastelaoves Gezelschap Jocus in de niej verbouwde Maaspoort.

Ouk dit jaor weer mochte ós kinder die gewónne hadde beej de declamatiewedstried mei doon met de Opus Jocus Leedjesaovend.
Bert Pollux had zien uùterse bés gedoon um de gedichjes die de leedjes aankondigde, weer zoeë schoeën meugelik gemak um aan de minse te prissentere.
’T waas weer ’n moei gezich um die snuutjes te zien straole op de buun.
Stök veur stök hebbe ze de gedichte kei good veur gedrage, ós komplemente dao veur!
Door waat verkiërd ingepland te hebbe met de tied van de kinder en de leedjes beej umroop Venlo en Jocus, kwame ós kinder dae aovend jaomer genóg neet in beeld veur de minse die thoes veur d’n tillevisie keke, waat we allemaol verschrikkelik vónde.
Maar op ’t ind van de aovend mochte ze allemaol beej de winnaers springe én hosse, det waas veur die blage toch ’n fees!
Zóndaag 6 november woord de oetzending nog ens herhaold mét de kinder van Veldeke d’r beej, hebbe we nog ens kinne genete van die schoeëne veurdrachte.

Kinder die jaor hebbe mei gedaon beej de Opus Jocus Leedjesaovend ware:

Sjraar Timmermans, Lynn Nissen, Julia Seetsen, Deveney van Cleef, Rik Martens, Isa Schatorie, Juul Brueren, Lony Wouters, Jamie Simons, Janey Donders en Bram Peeters.
Naeve d’n dank van VVG Jocus verdene de kinder ouk d’n dank van Veldeke-krink-Venlo.

Annemie Schleepen-Schweitzer.