U bent hier

Limburgse Declamatiefinale 2019

Veldeke Limburg organiseert jaorliks ‘n declamatiewedstried veur kinder van de basisschoeël. In verscheie laeftiedscategorieë kómme lierlinge van diverse schoeële op ‘t podium um ‘n dialek-teks (proza of poëzie) veur te drage. ‘n Deskundige jury kees oet de deilnemers ‘ne winnaer.

De finale van de declamatiewedstried 2019 vónd dit jaar veur de veerde kier op rie plaats in DOK6 in Panninge. Basisschoeëlkinder van groep 3 t/m 8, allemaol winnaers van de veurróndes in de kringe, zote op zaoterdaag 25 mei met eur elders, opa’s, oma’s, breurkes, zuskes en wae d’r vaerder nog beej hoorte, netjes op tied in de zaal.

De jury bestónd oet: Hortense Brounts, Katja Henz, Anke Peters, Herm Pollux en streektaalfunctionaris Ton van de Wijngaard. De dames en hiere hadde d’r ‘ne behuurlike klus aan um oet 30 kanjers de allerbeste te keze. Winnaers zien ‘t eigelik allemaol: dees kinder hebbe de veurróndes in euren eige krink gewónne. En det had ‘t muuskesstil luusterend pebliek, det ‘n groeëte variatie aan dialekte te hure kreeg, ouk door.

“Door de wies wao op kinder eur gedich laote hure en zeen, begrieps se ‘t hielemaol”, zag jurylid Herm. En Katja nuuejde eur oet um allemaol nao ‘t zuje te verhoeze, zoeëdet zeej iersdaags beej um in de brugklas kóste zitte. Ton vónd det de kwaliteit met ‘t jaor enorm stijg en Anke kós zich as ald-winnaeres weer gans inlaeve.

De winnaers

Waat ‘n verrassende veurdrachte zote d’r beej. De toekómstige Jocusprins stelde zich veur, weej hoorte wie se as dokter gemekkelik € 50,- kins verdene, wie ‘t klink as se rammels van d’n hónger, wie geweldig se dich kins veule as d’r nemes kiek, det ‘n scheetje toch ‘puur neteur’ is of wie se dich veuls as d’r nemes dialek taege dich praot.

Tiejes ‘t juryberaod zóng Jelke Schijlen oet Mestreech veer leedjes, waobeej ouk ‘t winnende songfestivalleedje ‘Arcade’ van Duncan Laurence.

Aansloetend makde juryveurzitter Hortense d’n oetslaag bekind. “Alle kinder hebbe ‘t supergood gedaon, maar sómmige hadde net nog waat extra’s, waodoor ze ‘n paar puntjes mier hebbe gekrege.”

Groep 3/4:

1. Freek Swiatalski oet Sustere met ‘Is mich det sjrikke’
2. Emmeline Verweij oet Tegele met ‘Wat ich later waere wil’
3. Yentl Moonen oet Nederwiert met ‘As nemes kiêktj’

Groep 5/6

1. Mirte Pustjens oet Ruuestere met ‘Eine wendj’
2. Jip Haagen oet Kerkraoj met ‘Went jinne kiekt’
3. Julia Silkens oet Remund met ‘Rammele van de hónger’

Groep 7/8

1. Bente Selder oet Heerle met ‘D’r hobby’ 
2. Evena Kraanen oet Sustere met ‘Nemes kalt plat taege mich’
3. Thijmen Höppner oet Nederwiert met ‘Rommel’.

Veur dees nege kinder waas d’r ‘ne prachtige Veldeke-trofee. En alle deilnemers ginge nao hoes met ‘n moeëje oeërkónde en ’n bidon met ‘t Veldeke-logo. Volgend jaor zeen weej eur gaer truuk!

Bron: website Veldeke Limburg