U bent hier

De versjes oet Tegele in 2018

De winnende gedichjes van Tegele:

Flappie
 
Flappie is mien knienke
Hae zit in ein höltere hok
Dök as ich óet de sjoël kôm
Sjpeule weej same in de sjop
 
Weej twië huëre ech beejein
En hebben ’t same hiel erg fijn
Wandele gaon weej oppe sjtoep
Mei haet hae den get keutels gepoep
 
Maar in de winkter, zoë taege körsmes aan
Is det loupe bóete van de baan
Den blief ich ’t allerleefste met 'm binne
Want emes kôs ens get geks verzinne
 
Ich bön bliej as ’t sjtrakkes wir veurjaor is
Want nao bóete gaon hebbe weej ech gemis
Mien knienke en ich… zienem baas
Sjpringe en rolle den wir door ‘t gráas
 
Leonie v.Hulten-v.Rhee
 
Zangdiva
 
Later waer ich 't allerleefste zangeres
Solo of in ein kuërke met ein man of zes
Op d’n televisie wil ich kômme
Wie? Det ken mich ech niks bômme
 
Dus wat môt ich nôw gaon doon
Liëre loupe op hoëge hakkkesjoon
Solo zinge of met emes same
Alves óetkiéke nao gesjikde name
 
Zinge, danse, sjpraekles en zoë mier
Oefene, oefene, kiër op kiër
Want asse ech beroemp wils zien
Kos det hiel vuël tiéd en pien
 
As ’t den later oëts geit lökke… of neet
Guëf det besjlis hiel vuël verdreet
Maar, ich heb d’r den alles aan gedaon
Vur nôw zal ich maar wir gewoën nao sjoël toe gaon
 
Leonie v.Hulten-v.Rhee
 
Beej ôs thóes
 
Mien breurke is gek op dino’s
En praot zelfs ein eige dinotaal
De brachiosaurus of tyrex
Mich is 't allemaol egaal

Mien zus zit vasgeplek aan ziene iPad
Het volg Bibi, Dylan Haegens en Enzo Knol
't Löp de gansen dáag met det dink rônk 
En haet 't aardig hoëg in zienem baol

Mien broor is 'ne voetballer
En môt iddere zôndig Studio Sport kiéke
Bóete duit hae asof hae Messi is
Ich ving 't ech nörges op liéke

Mien moder haet 'n zjwáak vur Tony (dae van Chocolony)
En den 't leefs de oranje of gaele kleur
In iddere laaj kumpse dae taege
En hae zörg vur 'n ontzettend good humeur

En den nag miene pap
Det is net ein klein kink
Gamen op de PlayStation 4
Det is wat hae super gaaf vingk

Beej ôs thóes is 't dus 'n aardig gekkehóes
Met allemaol versjillende hobby’s en winse
Maar zôl ich 't angers wille?
Ech neet! Want ich haaj van dees minse

 
Hanneke van der Sommen