U bent hier

Declamatie Limburg 2017

Limburgse finale declamatiewedstried.

Alle foto's van de finale:

In ein good gevöld Dok-6 in Panninge vónd zaoterdaagmiddaag 20 mei de Limburgse finale plaats van de declamatiewedstriede veur 28 Limburgse basisschoeëlkinder van groep 3 t/m 8. Oet de ganse provincie ware de winnaers van de veurróndes nao deze theaterzaal gekómme um eur gedich te laote hure en zeen aan 't publiek en neteurlik aan de viefkoppige  jury. Waat 'n kanjers zote d'r weer tösse en waat 'n flair hebbe die kinder! 't Waas genete van veurdrachte euver schoeëlperikele, favoriete of minder geleefde bieëste, leefhebberieje en van waat me as kind zoeëal mei kin make. 't Publiek kreeg te hure wae de baas in hoes waas, wie  bedtied kin waere opgerek, des se liemenaad toch ech iers mós aanlinge en wie rammele van d’n hónger klink, um d'r 'n paar te neume.

Prissentator Hans Jacobs stelde de kinder op 'n veurtreffelike meneer gerös as die toch waal waat zenuwechtig ware en leet 't programma lekker flot verloupe. Hae zörgde d'r veur det ze allemaol eur waal verdeende applaus krege. Ónder 't juryberaod zóng winnares van 't TVK 2017 Fiorenza Ruijters oet Valkeberg -ouk al mit 'n flitsende prissentatie- veer leedjes, wao ónder Zomer en Proud Mary.

'n Gemekkelike klus waas 't neet veur de jury, maar zeej ware 't d'r toch unaniem euver ins det Isa Meuwisse oet Ech mit 't door zien mam geschreve gedich Formule Max, det ging euver de toestande thoes as Max Verstappe aan 't race is, Limburgs Kampioen meus waere. Juryveurzitter Dwayne Horbach meugde aan de volgende kinder 'ne schoeëne Veldeketrofee oetreike:

groep 3 en 4:

1. Anouk Raijer, Tegele
2. Audrey Strüver, Kerkraoj
3. Thomas Camp, Weert
 

groep 5 en 6:

1. Thijmen Höppner, Weert
2. Ninthe Noteborn, Kerkraoj
3. Evi Pustjens, Ech/Zöstere
 

groep 7 en 8:

1. Isa Meuwissen en Limburgs kampioen 2017, Ech/Zöstere
2. Lisa Idink, Tegele
3. Tessa Stultiëns, Weert
 
En allemaol ginge ze met 'n oeërkónde, 'n Veldeke-pet en 'n strandbalset met Veldekelogo op hoes aan.